Cannes Film Festival 2023: ಮೈಮೇಲೆ ರಕ್ತ ಸುರಿದುಕೊಂಡು ರಷ್ಯಾ ವಿರುದ್ಧ ಪ್ರತಿಭಟಿಸಿದ ಮಹಿಳೆ
ಫ್ರಾನ್ಸ್‌ನಲ್ಲಿ 76ನೇ ಕೇನ್ಸ್ ಫಿಲ್ಮ್ ಫೆಸ್ಟಿವಲ್ ಆಯೋಜಿಸಲಾಗಿದ್ದು ಇದರಲ್ಲಿ ವಿಶ್ವದಾದ್ಯಂತದ ನಟ-ನಟಿಯರು ಭಾಗವಹಿಸುತ್ತಿದ್ದಾರೆ. ಈ ಚಲನಚಿತ್ರೋತ್ಸವ ಮೇ 27 ರಂದು ಕೊನೆಗೊಳ್ಳುತ್ತದೆ. ಇಲ್ಲಿ ಬಾಲಿವುಡ್‌ನ ಅನೇಕ ಪ್ರಸಿದ್ಧ ತಾರೆಯರು ಸೇರಿದಂತೆ ಪ್ರಪಂಚದಾದ್ಯಂತ ಜನರು ಫ್ಯಾಷನ್ ಲೋಕವನ್ನೇ ಸೃಷ್ಟಿ ಮಾಡುತ್ತಿದ್ದಾರೆ. ಕ್ಯಾನೆಸ್ ಚಲನಚಿತ್ರೋತ್ಸದಲ್ಲಿ ಸ್ಟಾರ್‌ ನಟ-ನಟಿಯರು, ನಿರ್ದೇಶಕರು, ನಿರ್ಮಾಪಕರು, ನೃತ್ಯ ಕಲಾವಿದರು, ಸಿಂಗರ್ಸ್ ಇತರರು ನಿತ್ಯ ಭಾಗವಹಿಸುತ್ತಿದ್ದಾರೆ. ಅನೇಕ ಪ್ರಸಿದ್ಧ ತಾರೆಯರು ತಮ್ಮ ಉಪಸ್ಥಿತಿಯೊಂದಿಗೆ ರೆಡ್ ಕಾರ್ಪೆಟ್ ಅನ್ನು ಅಲಂಕರಿಸುತ್ತಿದ್ದಾರೆ.
ಈ ನಡುವೆ ಕೇನ್ಸ್ ಚಲನಚಿತ್ರೋತ್ಸವದಲ್ಲಿ ಭಾನುವಾರ ವಿಚಿತ್ರ ಘಟನೆಯೊಂದು ನಡೆದಿರುವುದು ವರದಿಯಾಗಿದೆ. ಉಕ್ರೇನ್ ಧ್ವಜದ ಬಣ್ಣದ ಉಡುಗೆ ಧರಿಸಿದ ಮಹಿಳೆಯೊಬ್ಬರು ಭಾನುವಾರ 76 ನೇ ಕೇನ್ಸ್ ಚಲನಚಿತ್ರೋತ್ಸವದ ರೆಡ್ ಕಾರ್ಪೆಟ್ ಮೇಲೆ ವಿಚಿತ್ರವಾಗಿ ನಡೆದುಕೊಂಡು ಪ್ರತಿಭಟನೆ ನಡೆಸಿರುವುದು ಕಂಡು ಬಂದಿದೆ.
ಫ್ರೆಂಚ್ ಚಲನಚಿತ್ರ ನಿರ್ದೇಶಕ ಜಸ್ಟ್ ಫಿಲಿಪ್ ಅವರ ‘ಅಸೈಡ್’ ಚಲನಚಿತ್ರದ ಪ್ರದರ್ಶನದ ಸಂದರ್ಭದಲ್ಲಿ ಪಲೈಸ್ ಡೆಸ್ ಮೆಟ್ಟಿಲುಗಳ ಮೇಲೆ ನಡೆದ ಮಹಿಳಾ ಏಕಾಏಕಿ ತನ್ನ ಬಳಿ ಇದ್ದ ರಕ್ತ ಬಣ್ಣದ ದ್ರವವನ್ನು ಮೈ ಮೇಲೆ ಸುರಿದುಕೊಂಡು ರಷ್ಯಾ ವಿರುದ್ಧ ಪ್ರತಿಭಟನೆ ಮಾಡಿದ್ದು ಕಂಡು ಬಂದಿದೆ. ಈ ಘಟನೆಯ ವೀಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದೆ. ಮಹಿಳಾ ಪ್ರತಿಭಟನಾಕಾರರು ಉಕ್ರೇನ್‌ನ ಧ್ವಜದ ಬಣ್ಣವಿರುವ ಉಡುಪನ್ನು ಧರಿಸಿ ಚಲನಚಿತ್ರೋತ್ಸವಕ್ಕೆ ಆಗಮಿಸಿದರು. ನೀಲಿ ಹೀಲ್ಸ್‌ ಹಾಕಿದ್ದ ಮಹಿಳೆ ಹಳದಿ ಮತ್ತು ನೀಲಿ ಬಣ್ಣದ ಉಡುಗೆಯನ್ನು ತೊಟ್ಟಿದ್ದರು. ಇವರು ಕ್ಯಾಮೆರಾಗಳ ಕಡೆಗೆ ನಡೆದುಕೊಂಡು ಬಂದು ಕ್ಯಾಮೆರಾಗಳನ್ನು ನೋಡಿ ನಗುತ್ತಾರೆ. ಅದರ ನಂತರ ಮೆಟ್ಟಿಲುಗಳ ಮೇಲೆ ನಿಂತು ನಕಲಿ ರಕ್ತವನ್ನು ತೆಗೆದುಕೊಂಡು ಬಂದಿದ್ದ ಆಕೆ ತನ್ನ ಮೇಲೆ ಸುರಿದುಕೊಳ್ಳುತ್ತಾಳೆ. ಆ ಸಮಯದಲ್ಲಿ ಭದ್ರತಾ ಸಿಬ್ಬಂದಿ ಮಹಿಳೆಯನ್ನು ಅಲ್ಲಿಂದ ಕರೆದೊಯ್ಯುತ್ತಾರೆ. ಟೆಲಿಗ್ರಾಫ್‌ನಲ್ಲಿನ ವರದಿಯ ಪ್ರಕಾರ, ಕ್ಯಾನೆಸ್ ಫಿಲ್ಮ್ ಫೆಸ್ಟಿವಲ್‌ನ ನಿರ್ದೇಶಕ ಥಿಯೆರ್ರಿ ಫ್ರೆಮಾಕ್ಸ್ ಕಳೆದ ವಾರ ಈವೆಂಟ್ ಉಕ್ರೇನ್‌ನೊಂದಿಗೆ ನಿಂತಿದೆ ಎಂದು ಹೇಳಿದರು.
ಉತ್ಸವದ ಉದ್ಘಾಟನಾ ಸಮಾರಂಭದಲ್ಲಿ, ಫ್ರೆಂಚ್ ನಟಿ ಕ್ಯಾಥರೀನ್ ಡೆನ್ಯೂವ್ ಅವರು ಉಕ್ರೇನಿಯನ್ ಕವಿ ಲೆಸಿಯಾ ಉಕ್ರೈಂಕಾ ಅವರ ಹೋಪ್ ಕವಿತೆಯನ್ನು ಓದುವ ಮೂಲಕ ಯುದ್ಧದಲ್ಲಿ ಬಲಿಯಾದವರಿಗೆ ಗೌರವ ಸಲ್ಲಿಸಿದರು. ರಷ್ಯಾದ ನಿಯೋಗಗಳು ಅಥವಾ ರಷ್ಯಾದ ಸರ್ಕಾರಕ್ಕೆ ಸಂಬಂಧಿಸಿದ ಚಲನಚಿತ್ರ ಕಂಪನಿಗಳ ಮೇಲಿನ ನಿಷೇಧವು ಕಳೆದ ವರ್ಷ ಜಾರಿಗೆ ಬಂದ ನಂತರ ಈ ವರ್ಷ ಈವೆಂಟ್‌ಗೆ ಹಾಜರಾಗಲು ರಷ್ಯನ್ನರಿಗೆ ಅನುಮತಿ ಇಲ್ಲ ಎಂದು ಟೆಲಿಗ್ರಾಫ್ ವರದಿ ಮಾಡಿದೆ. ಕಳೆದ ವರ್ಷದ ಉತ್ಸವದಲ್ಲಿ, ಉಕ್ರೇನಿಯನ್ ಮಹಿಳೆಯೊಬ್ಬರು ತನ್ನ ದೇಹದ ಮೇಲೆ “ಅತ್ಯಾಚಾರವನ್ನು ನಿಲ್ಲಿಸಿ” ಎಂದು ಬರೆದು ರಷ್ಯಾದ ಮಿಲಿಟರಿಯ ವಿರುದ್ಧ ನಗ್ನವಾಗಿ ರೆಡ್ ಕಾರ್ಪೆಟ್ ಮೇಲೆ ನಡೆದರು. 5 5 5 5 ಮೇ 16 ರಂದು ಕೇನ್ಸ್ ಚಲನಚಿತ್ರೋತ್ಸವದ 76 ನೇ ಆವೃತ್ತಿ ಆರಂಭವಾಗಿದೆ. ಈ ಉತ್ಸವವನ್ನು 10 ದಿನಗಳವರೆಗೆ ಅಂದರೆ ಮೇ 27 ರವರೆಗೆ ನಡೆಸಲಾಗುತ್ತದೆ. ಫ್ರಾನ್ಸ್‌ನ ಫ್ರೆಂಚ್ ರಿವೇರಿಯಾ ಪ್ರದೇಶದ ಕ್ಯಾನೆಸ್ ಪಟ್ಟಣದಲ್ಲಿ ಸಮಾರಂಭವನ್ನು ಅದ್ಧೂರಿಯಾಗಿ ನಡೆಸಲಾಗುತ್ತಿದೆ. ಈ ಸಮಾರಂಭವನ್ನು ನೇರವಾಗಿ ಕೇನ್ಸ್ ಚಲನಚಿತ್ರೋತ್ಸವದ ಅಧಿಕೃತ ವೆಬ್‌ಸೈಟ್‌ನಲ್ಲಿ ವೀಕ್ಷಿಸಬಹುದು. ಇದಲ್ಲದೆ, ಕಾನ್ಸ್ ಫಿಲ್ಲಿ ಫೆಸ್ಟಿವಲ್‌ನ ಅಧಿಕೃತ ಸಾಮಾಜಿಕ ಮಾಧ್ಯಮ ಹ್ಯಾಂಡಲ್‌ಗಳಲ್ಲಿ ಇದನ್ನು ವೀಕ್ಷಿಸಬಹುದು.
ಈವರೆಗೆ ಈ ಇವೆಂಟ್‌ನಲ್ಲಿ ನಟಿ ಊರ್ವಶಿ ರೌಟೇಲಾ, ಐಶ್ವರ್ಯ ರೈ ಬಚ್ಚನ್ ಸೇರಿದಂತೆ ಅನೇಕ ಪ್ರತಿಭಾವಂತ ನಟಿಯರು ಭಾಗವಹಿಸಿದ್ದಾರೆ. ಕೇನ್ಸ್ ಫಿಲ್ಮ್ ಫೆಸ್ಟಿವಲ್ ಅಂತರಾಷ್ಟ್ರೀಯ ಸಿನಿಮಾಗಳ ವಾರ್ಷಿಕ ಆಚರಣೆಯಾಗಿದೆ. ಇದು ಪ್ರಪಂಚದಾದ್ಯಂತದ ನಿರ್ದೇಶಕರು, ನಟರು, ನಿರ್ಮಾಪಕರು, ವಿತರಕರು ಮತ್ತು ಚಲನಚಿತ್ರ ವಿಮರ್ಶಕರನ್ನು ಒಂದೇ ವೇದಿಕೆಯಲ್ಲಿ ತರುತ್ತದೆ. ಹೀಗಾಗಿ ಕೇನ್ಸ್ ಚಲನಚಿತ್ರೋತ್ಸವ ಸಾಕಷ್ಟು ಪ್ರಸಿದ್ಧವಾಗಿದೆ. ವಿಶ್ವದ ಚಲನಚಿತ್ರೋದ್ಯಮದ ಅತ್ಯುತ್ತಮ ಚಲನಚಿತ್ರಗಳನ್ನು ಇಲ್ಲಿ ಪ್ರದರ್ಶಿಸಲಾಗುತ್ತದೆ. ಈ ಉತ್ಸವದಲ್ಲಿ, ಎಲ್ಲಾ ಕ್ಷೇತ್ರಗಳ ತಜ್ಞರು ಮತ್ತು ಪರಿಣಿತರು ತೀರ್ಪುಗಾರರ ಸದಸ್ಯರಾಗಿರುತ್ತಾರೆ.
