ಚಿತ್ರದುರ್ಗ: ಬಹು ದಶಕಗಳ ಕನಸು, ಚಿತ್ರದುರ್ಗ ಜಿಲ್ಲಾ ನೀರಾವರಿ ಹೋರಾಟ ಸಮಿತಿ ನಿರಂತರ ನಡೆಸಿದ ಹೋರಾಟದ ಫಲ ಭದ್ರೆ ಯೋಜನೆ ಜಾರಿಗೊಂಡಿದ್ದು, ಅಧಿಕೃತವಾಗಿ ಸೆ.6ರಂದು ಚಿತ್ರದುರ್ಗ ಶಾಖಾ ಕಾಲುವೆಗೆ ನೀರು ಹರಿಸುವ ಕಾರ್ಯ ಆರಂಭವಾಗಲಿದೆ. ಈ ಹಿನ್ನೆಲೆಯಲ್ಲಿ ಚಿತ್ರದುರ್ಗ ಜಿಲ್ಲಾ ನೀರಾವರಿ ಹೋರಾಟ ಸಮಿತಿ ನೇತೃತ್ವದಲ್ಲಿ ಶನಿವಾರ ಸಂಜೆ ಪ್ರವಾಸಿ ಮಂದಿರ ಆವರಣದಲ್ಲಿ ಸಂಭ್ರಮೋತ್ಸವ ಆಚರಿಸಲಾಯಿತು.
ನೆರೆದಿದ್ದವರೆಲ್ಲರಿಗೂ ಸಿಹಿ ಹಂಚಿ ಸಂಭ್ರಮಿಸಲಾಯಿತು. ಶ್ರೀ ಬಸವನಾಗಿದೇವ ಸ್ವಾಮೀಜಿ ಮಾತನಾಡಿ, ಬರಡು ನೆಲಕ್ಕೆ ನೀರುಣಿಸಬೇಕೆಂದು ಚಿತ್ರದುರ್ಗ ಜಿಲ್ಲಾ ನೀರಾವರಿ ಹೋರಾಟ ಸಮಿತಿ ನೇತೃತ್ವದಲ್ಲಿ 30 ವರ್ಷ ನಡೆಸಿದ ಹೋರಾಟದ ಫಲ ಜಿಲ್ಲೆಗೆ ಭದ್ರೆ ನೀರು ಹರಿಯುತ್ತಿದೆ. ಸುಸಂದರ್ಭವನ್ನು ಸ್ಮರಣೀಯಗೊಳಿಸಲು ತುರ್ತಾಗಿ ಸಂಭ್ರಮೋತ್ಸವ ಆಯೋಜಿಸಿರುವುದು ಸಮಯೋಜಿತ ಎಂದರು.
ಪ್ರತಿ ಜೀವಸಂಕುಲಕ್ಕೆ ನೀರು ಅಗತ್ಯ. ಆದರೆ, ನೂರಾರು ವರ್ಷಗಳ ಕಾಲ ಬರಗಾಲಕ್ಕೆ ಸಿಲುಕಿ ಬಳಲಿದ ಜಿಲ್ಲೆಯ ಜನರಿಗೆ ಭದ್ರೆ ನೀರೊಂದೇ ಆಶ್ರಯವಾಗಿತ್ತು. ಅದನ್ನು ಪಡೆದುಕೊಳ್ಳುವಲ್ಲಿ ಅನೇಕರ ಶ್ರಮ, ಹೋರಾಟ, ಛಲ ಇದೆ. ಪಿ.ಕೋದಂಡರಾಮಯ್ಯ, ಎಂ.ಜಯಣ್ಣ, ಮುರುಘ ರಾಜೇಂದ್ರ ಒಡೆಯರ್, ಸೋಮಗುದ್ದು ರಂಗಸ್ವಾಮಿ ಹೀಗೆ ಸಹಸ್ರಾರು ಜನರು ಹೋರಾಟದ ಹಾದಿ ಸವಿಸಿದ್ದಾರೆ ಎಂದು ಸ್ಮರಿಸಿದರು. ಹೋರಾಟ ಸಮಿತಿ ಹುಟ್ಟಿ ಚಲನೆ ಪಡೆದುಕೊಂಡಾಗ ನೋಡಿ ನಕ್ಕುವರೇ ಹೆಚ್ಚು. ಭದ್ರಾ ಮೇಲ್ದಂಡೆ ಯೋಜನೆಯೆಂಬುದು ಗಗನಕುಸುಮ. ಇದು ಸಾಧ್ಯವಿಲ್ಲದ ಯೋಜನೆಯೆಂದೇ ಅಭಿಪ್ರಾಯಪಟ್ಟರು.
ಆದರೂ ಭ್ರಮನಿರಸನಗೊಳ್ಳದೆ ಹೋರಾಟ ಮುಂದುವರಿಸಿ, ಯೋಜನೆ ಜಾರಿಗೆ ಶ್ರಮಿಸಿದ ಚಳವಳಿಗಾರರ ನಡೆ ಮಾದರಿ ಆಗಿದೆ ಎಂದರು.ಸಂಚಾಲಕ ಚಳ್ಳಕೆರೆ ಬಸವರಾಜ್ ಮಾತನಾಡಿ, ಬಂಜಗೆರೆ ಜಯಪ್ರಕಾಶ್ ಸೇರಿ ಅನೇಕರು ಮೊದಲ ಬಾರಿಗೆ ಅಧ್ಯಯನ ಕೈಗೊಂಡು, ಯೋಜನೆ ಸಾಧಕ-ಬಾಧಕ ಮನದಟ್ಟು ಮಾಡಿಕೊಂಡ ಬಳಿಕವೇ ಹೋರಾಟಕ್ಕೆ ಧುಮುಕಿದ್ದು ಎಂದು ತಿಳಿಸಿದರು.
ಚಿಂತಕ ಜೆ.ಯಾದವರೆಡ್ಡಿ ಮಾತನಾಡಿ, ಬಯಲುಸೀಮೆಗೆ ನೀರುಣಿಸುವ ಹೋರಾಟದಲ್ಲಿ ಜಿಲ್ಲೆಯ
ಜನರಿಗೆ ಗೆಲುವು ಸಿಕ್ಕಿದೆ. ಶಾಂತಿಯುತ ಮಾರ್ಗದಲ್ಲಿ ನಡೆದ ಹೋರಾಟ ಇಡೀ ನಾಡಿಗೆ ಮಾದರಿ ಎಂದು ಬಣ್ಣಿಸಿದರು. ದಸಂಸ ಮುಖಂಡ ಕೆ.ರಾಜು ಮಾತನಾಡಿ, ಆರಂಭದಿAದಲೂ ಚಳವಳಿಗಾಗಿ ಬದುಕು ಮೀಸಲಿಟ್ಟವರ ಸ್ಮರಣೆ ಮಾಡಬೇಕು. ಚಳವಳಿ ಗೆದ್ದಾಗ ಅದರ ಲಾಭ ಪಡೆಯಲು ಸಾವಿರಾರು ಮಂದಿ ಕಳ್ಳದಾರಿಯಲ್ಲಿ ಬರುತ್ತಾರೆ. ಅದಕ್ಕೆ ಅವಕಾಶ ಕೊಡದೆ ನೈಜ ಹೋರಾಟಗಾರರನ್ನು ಸ್ಮರಿಸಬೇಕೆಂದು ತಿಳಿಸಿದರು.
ವಕೀಲ ಸಿ.ಶಿವುಯಾದವ್ ಮಾತನಾಡಿ, ಹೋರಾಟದ ನೇತೃತ್ವವನ್ನು ವಹಿಸಿಕೊಂಡ ಮುನ್ನಡೆಸಿದ ಪತ್ರಕರ್ತರ ಜಾಣ್ಮೆ ವಿಸ್ಮಯ. ಭದ್ರಾ ಯೋಜನೆ ಸಾಧ್ಯವೇ ಇಲ್ಲವೆಂಬ ಅಭಿಪ್ರಾಯ ಗಟ್ಟಿಯಾಗಿ ಬೇರೂರಿದ್ದ ವೇಳೆ ಹೋರಾಟ ಕೈಗೆತ್ತಿಕೊಂಡು ಜಾರಿಯವರೆಗೂ ವಿರಮಿಸದಿರುವುದು ಪ್ರಮುಖ ಕಾರಣ ಎಂದು ತಿಳಿಸಿದರು.
ಸಂಚಾಲಕ ನರೇನಹಳ್ಳಿ ಅರುಣ್‌ಕುಮಾರ್ ಮಾತನಾಡಿ, ಯೋಜನೆ ಜಾರಿ ಹೋರಾಟದಲ್ಲಿ ಜಿಲ್ಲೆಯ ಎಲ್ಲ ಮಠಾಧೀಶರು, ರಾಜಕಾರಣಿಗಳು, ನೂರಾರು ಸಂಘಟನೆಗಳ ಪದಾಧಿಕಾರಿಗಳು, ಎಲ್ಲ ಪಕ್ಷಗಳ ಸದಸ್ಯರು, ಜನಪ್ರತಿನಿಧಿಗಳು ಪಾಲ್ಗೊಂಡಿದ್ದರು. ಅದರ ಫಲವೇ ಯೋಜನೆ ಜಾರಿಗೊಂಡಿದೆ ಎಂದರು.
ಸಂಚಾಲಕ ಜೋಗಿಮಟ್ಟಿ ಈ.ಮಹೇಶಬಾಬು, ಮುಖಂಡರಾದ ಜಿ.ಯು.ನಾಗರಾಜ್ ಗೌನಹಳ್ಳಿ, ಎಂ.ಜೆ.ಪ್ರಸನ್ನ, ವೀಣಾ ಗೌರಮ್ಮ, ಕುಂಚಿಗನಾಳ್ ಮಹಾಲಿಂಗಪ್ಪ, ಅನಂತ್,
ತಿಮ್ಮಪ್ಪನಹಳ್ಳಿ ಮಂಜುನಾಥ್, ಲಕ್ಷಿö್ಮÃಕಾಂತ್, ಡಿ.ಎಸ್.ಹಳ್ಳಿ ಮಲ್ಲಿಕಾರ್ಜುನ್,
ಏಕಾಂತಪ್ಪ, ಕೆಪಿಎಂ ಗಣೇಶಯ್ಯ, ಶ್ರೀನಿವಾಸ ನಾಯ್ಕ್, ಮಹಾಂತೇಶ್, ಪ್ರದೀಪ್‌ಕುಮಾರ್,
ಪ್ರಹ್ಲಾದ್, ಗೌನಹಳ್ಳಿ ಗೋವಿಂದಪ್ಪ, ಪುರುಷೋತ್ತಮ ತೋರಣಕಟ್ಟೆ, ಕಣಿವೆ ಮಾರಮ್ಮ
ತಿಪ್ಪೇಸ್ವಾಮಿ ಇತರರಿದ್ದರು.
