ಅಮೆರಿಕ : ತಾಯಿಯ ಪ್ರವಾಸದ ಗೀಳು ಭೂಮಿಯ ಮೇಲೆ ಮಗುವಿನ ಆಯಸ್ಸು 16 ತಿಂಗಳಿಗೇ ಮುಕ್ತಾಯ ಮಾಡಿದೆ.. ಳಲೂ ಕೂಡ ಭೀಕರವಾಗಿರುವ ಘಟನೆ ನಡೆದಿರುವುದು ಅಮೆರಿಕದ ಓಹಿಯೋ ರಾಜ್ಯದಲ್ಲಿ. ತನ್ನ ಮಗು ತನ್ನ ಕಾಲ ಮೇಲೆ ನಡೆಯುವವರೆಗೂ ಒಂದು ಹಂತಕ್ಕೆ ಬೆಳೆಯುವವರೆಗೂ ತಾಯಿ ಅದೆಷ್ಟು ಜೋಪಾನ ಮಾಡುತ್ತಾಳೆಂದರೆ, ಆಕೆಯ ಅದೆಷ್ಟೋ ಕನಸುಗಳು ಮಗುವಿನ ನಗುವಿನ ಅಡಿಗೆ ಹೋಗಿರುತ್ತದೆ. ಆದರೆ, ಓಹಿಯೋದ ಕ್ಲೆವ್‌ಲ್ಯಾಂಡ್‌ನಲ್ಲಿ ಮಹಾತಾಯಿಯೊಬ್ಬಳು ತನ್ನ 16 ತಿಂಗಳ ಮಗುವನ್ನು ಮನೆಯಲ್ಲಿ ಏಕಾಂಗಿಯಾಗಿ ಬಿಟ್ಟು ಪೋರ್ಟೋರಿಕೋಗೆ 10 ದಿನಗಳ ಪ್ರವಾಸಕ್ಕೆ ಹೋಗಿದ್ದಾಳೆ. ಮನೆಗೆ ಬಂದು ನೋಡಿದಾಗ, ಇದ್ದ ಬಟ್ಟೆಯಲ್ಲೇ ಮಲ, ಮೂತ್ರ ಮಾಡಿಕೊಂಡಿದ್ದ ಮಗು, ಒಂದು ತೊಟ್ಟು ನೀರೂ ಇಲ್ಲದೆ ಸಾವು ಕಂಡಿತ್ತು. ಇದರ ಬೆನ್ನಲ್ಲಿಯೇ ಪೊಲೀಸರು 31 ವರ್ಷದ ತಾಯಿ ಕ್ರಿಸ್ಟೆಲ್‌ ಕ್ಯಾಂಡೆಲಾರಿಯೊ ವಿರುದ್ಧ ಕೊಲೆ ಪ್ರಕರಣದ ದಾಖಲಿಸಿ ಜೈಲಿಗೆ ಅಟ್ಟಿದ್ದಾರೆ. ಆಕೆಯ ಪಕ್ಕದ ಮನೆಯವರ ಹೇಳಿಕೆಗಳನ್ನೂ ಪೊಲೀಸರು ಪಡೆದುಕೊಂಡಿದ್ದು, ಮಗುವನ್ನು ಮನೆಯಲ್ಲಿಯೇ ಏಕಾಂಗಿಯಾಗಿ ಬಿಟ್ಟು ಹೋಗಿದ್ದು ಇದು ಮೊದಲ ಸಲವೇನಲ್ಲ ಎಂದು ತಿಳಿಸಿದ್ದಾರೆ. ನಾವು ಸಾಕಷ್ಟು ಬಾರಿ ಆಕೆಗೆ ತಿಳಿಸಿ ಹೇಳಿದ್ದೆವು. ಪುಟ್ಟ ಮಕ್ಕಳನ್ನು ಏಕಾಂಗಿಯಾಗಿ ಬಿಟ್ಟು ಹೋಗುತ್ತಿದ್ದಳು. ನನ್ನ ಸ್ನೇಹಿತೆಯೂ ಕೂಡ ಆಕೆಗೆ ಇದನ್ನು ಹೇಳಿದ್ದಳು. ಆದರೆ, ಆಕೆ ಯಾರ ಮಾತನ್ನೂ ಕೇಳುತ್ತಿರಲಿಲ್ಲ ಎಂದು ತಿಳಿಸಿದ್ದಾರೆ.
