ಮಂಗಳೂರು: ತಾಪಮಾನ ಏರಿಕೆಯಿಂದ ಮೀನುಗಾರಿಕೆ ವ್ಯತಿರಿಕ್ತ ಪರಿಣಾಮ ಅನುಭವಿಸುತ್ತಿದ್ದು, ಶೇಕಡಾ 80ರಷ್ಟು ಬೋಟ್‌ಗಳು ದಡದಲ್ಲೇ ಲಂಗರು ಹಾಕಿವೆ. ಇದರ ಪರಿಣಾಮವಾಗಿ, ಹೊರ ರಾಜ್ಯಗಳಿಂದ ಮೀನು ಆಮದು ಮಾಡಿಕೊಳ್ಳುವ ಅಗತ್ಯತೆ ಎದುರಾಗಿದೆ.
ಆಗಸ್ಟ್ ನಂತರ ಪ್ರಾರಂಭವಾಗುವ ಪ್ರಮುಖ ಮೀನುಗಾರಿಕೆ ಡಿಸೆಂಬರ್ ಮತ್ತು ಜನವರಿಯಲ್ಲಿ ಸ್ವಲ್ಪ ಕುಂಠಿತವಾಗುತ್ತದೆ. ಫೆಬ್ರವರಿ ಮತ್ತು ಮಾರ್ಚ್ ತಿಂಗಳಲ್ಲಿ ಎರಡನೇ ಹಂತದ ಮೀನುಗಾರಿಕೆ ಆರಂಭವಾಗುತ್ತದೆ, ಈ ಸಮಯ ಮೀನುಗಾರರಿಗೆ ಸುಗ್ಗಿಯ ಕಾಲವಾಗಿರುತ್ತದೆ. ಆದರೆ, ಈ ವರ್ಷ ನಿರೀಕ್ಷಿತ ಮಟ್ಟದಲ್ಲಿ ಮೀನುಗಳು ಬಲೆಗೆ ಬೀಳುತ್ತಿಲ್ಲ ಎಂದು ಮೀನುಗಾರರು ಅಳಲು ತೋಡಿಕೊಂಡಿದ್ದಾರೆ. ಈ ಕಾರಣದಿಂದ ಕೇವಲ ಶೇಕಡಾ 20ರಷ್ಟು ಬೋಟ್ ಮಾಲಕರು ಮಾತ್ರ ಮೀನುಗಾರಿಕೆಗೆ ತೆರಳುತ್ತಿದ್ದಾರೆ.
ಹಿಂದಿನ ವರ್ಷಗಳಲ್ಲಿ ಬಂಗುಡೆಯ ಸೀಸನ್‌ನಲ್ಲಿ ಪ್ರಚಂಡ ಪ್ರಮಾಣದಲ್ಲಿ ಮೀನು ಸಿಕ್ಕಿದ್ದರಿಂದ, ದರ ಕುಸಿತವಾಗಿತ್ತು. ಆದರೆ ಈ ವರ್ಷ ಗಳಗ ಮೀನು ಸಿಗದೆ ಬೋಟ್ ಮಾಲಕರು ಸಂಕಷ್ಟಕ್ಕೊಳಗಾಗಿದ್ದಾರೆ. ಸಾಮಾನ್ಯವಾಗಿ 27 ಡಿಗ್ರಿ ಸೆಲ್ಸಿಯಸ್‌ದಿಂದ 32 ಡಿಗ್ರಿ ಸೆಲ್ಸಿಯಸ್ ವಾತಾವರಣವು ಮೀನುಗಳಿಗೆ ಅನುಕೂಲಕರ. ಆದರೆ, ಪ್ರಸಕ್ತ 35 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಿದ ತಾಪಮಾನ ಮೀನುಗಳನ್ನು ಸಮುದ್ರದ ಆಳಕ್ಕೆ ಕೊಂಡೊಯ್ದಿದ್ದು, ಮೀನುಗಾರಿಕೆಗೆ ಅಡ್ಡಿಯಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
