ಮುಂಬೈ : ಹೊಂಬಾಳೆ ತನ್ನ ಮೊದಲ ಹಿಂದಿ ಪ್ಯಾನ್ ಇಂಡಿಯಾ ಸಿನಿಮಾದ ಘೋಷಣೆ ಮಾಡಿದ್ದು, ಬಾಲಿವುಡ್ನ ಸ್ಟಾರ್ ನಟನ ಜೊತೆಗೆ ಸಿನಿಮಾ ಮಾಡಲು ಮುಂದಾಗಿದೆ. ವರ್ಷದಿಂದ ವರ್ಷಕ್ಕೆ ತನ್ನ ವ್ಯಾಪ್ತಿಯನ್ನು ವಿಸ್ತಾರಗೊಳಿಸುತ್ತಲೇ ಸಾಗುತ್ತಿರುವ ಹೊಂಬಾಳೆ ಫಿಲಮ್ಸ್, ಮಲಯಾಳಂ, ತೆಲುಗು ಮತ್ತು ತಮಿಳಿನ ಬಳಿಕ ಇದೀಗ ಬಾಲಿವುಡ್ಗೆ ಕಾಲಿರಿಸಿದೆ.
ಹೃತಿಕ್ ರೋಷನ್ ಮುಂಬರುವ ಪ್ಯಾನ್-ಇಂಡಿಯಾ ಚಿತ್ರಕ್ಕಾಗಿ ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣ ಬ್ಯಾನರ್ ಜೊತೆ ಸಹಯೋಗ ಹೊಂದಲು ಸಜ್ಜಾಗಿದ್ದಾರೆ. ಕೆಜಿಎಫ್ ಫ್ರಾಂಚೈಸ್, ಸಲಾರ್ ಮತ್ತು ಕಾಂತಾರದಂತಹ ಯೋಜನೆಗಳಿಗೆ ಹೆಸರುವಾಸಿಯಾದ ಪ್ರೊಡಕ್ಷನ್ ಬ್ಯಾನರ್ ಬುಧವಾರ ತನ್ನ ಅಧಿಕೃತ ಎಕ್ಸ್ ಹ್ಯಾಂಡಲ್‌ನಲ್ಲಿ ಈ ಸುದ್ದಿಯನ್ನು ಹಂಚಿಕೊಂಡಿದೆ.
ಸಹಯೋಗದ ಬಗ್ಗೆ ಮಾತನಾಡಿದ ಹೃತಿಕ್, “ಹೊಂಬಾಳೆ ಹಲವು ವರ್ಷಗಳಿಂದ ಕೆಲವು ವಿಶಿಷ್ಟ ಕಥೆಗಳಿಗೆ ನೆಲೆಯಾಗಿದೆ. ನಾನು ಅವರೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳಲು ಮತ್ತು ನಮ್ಮ ಪ್ರೇಕ್ಷಕರಿಗೆ ಸಿನಿಮೀಯ ಅನುಭವವನ್ನು ನೀಡಲು ಎದುರು ನೋಡುತ್ತಿದ್ದೇನೆ. ನಾವು ದೊಡ್ಡ ಕನಸು ಕಾಣುತ್ತಿದ್ದೇವೆ ಮತ್ತು ದೃಷ್ಟಿಯನ್ನು ಜೀವಂತಗೊಳಿಸಲು ಬದ್ಧರಾಗಿದ್ದೇವೆ” ಎಂದು ಹಂಚಿಕೊಂಡಿದ್ದಾರೆ.
