ಸೂರತ್ : ಸೂರತ್‌ನ ವಸತಿ ಗೋಪುರವೊಂದರಲ್ಲಿ ಶುಕ್ರವಾರ ಬೆಳಿಗ್ಗೆ ಬೆಂಕಿ ಕಾಣಿಸಿಕೊಂಡಿದ್ದು, ಅದರ ಟೆರೇಸ್‌ನಲ್ಲಿ ಸಿಲುಕಿದ್ದ 18 ಜನರನ್ನು ರಕ್ಷಿಸಲಾಗಿದೆ ಎಂದು ವರದಿಯಾಗಿದೆ.
ನಗರದ ವೆಸು ಪ್ರದೇಶದಲ್ಲಿರುವ ಬಹುಮಹಡಿ ಹ್ಯಾಪಿ ಎಕ್ಸೆಲೆನ್ಸಿಯಾ ಕಟ್ಟಡದ ಏಳನೇ ಮಹಡಿಯಲ್ಲಿ ಬೆಳಿಗ್ಗೆ 8 ಗಂಟೆ ಸುಮಾರಿಗೆ ಬೆಂಕಿ ಕಾಣಿಸಿಕೊಂಡಿದ್ದು, ಶೀಘ್ರದಲ್ಲೇ ಮೇಲಿನ ಎರಡು ಮಹಡಿಗಳನ್ನು ಆವರಿಸಿದೆ ಎಂದು ಸೂರತ್ ಮೇಯರ್ ದಕ್ಷೇಶ್ ಮಾವಾನಿ ತಿಳಿಸಿದ್ದಾರೆ.
ಕಟ್ಟಡದ ಎದುರು ವಾಸಿಸುವ ಗುಜರಾತ್ ಗೃಹ ಸಚಿವ ಹರ್ಷ ಸಾಂಘವಿ ಸ್ಥಳಕ್ಕೆ ಧಾವಿಸಿ ರಕ್ಷಣಾ ಕಾರ್ಯಾಚರಣೆಯ ಮೇಲ್ವಿಚಾರಣೆ ನಡೆಸಿದರು. ಹೊಗೆ ಮತ್ತು ಜ್ವಾಲೆಯಿಂದ ತಮ್ಮನ್ನು ರಕ್ಷಿಸಿಕೊಳ್ಳಲು ಅನೇಕರು ಟೆರೇಸ್‌ಗೆ ಹೋದರು ಎಂದು ರಕ್ಷಿಸಲ್ಪಟ್ಟ ನಿವಾಸಿಯೊಬ್ಬರು ಹೇಳಿದರು.ಅಗ್ನಿಶಾಮಕ ದಳವು ಮೊದಲು 40 ನಿವಾಸಿಗಳಿಗೆ ಮೆಟ್ಟಿಲುಗಳನ್ನು ಇಳಿಯಲು ಸಹಾಯ ಮಾಡಿತು ಮತ್ತು ನಂತರ ಇತರರನ್ನು ಟೆರೇಸ್‌ನಿಂದ ರಕ್ಷಿಸಿತು ಎಂದು ಅವರು ಹೇಳಿದರು.
“ಕಟ್ಟಡದ ಅನೇಕ ನಿವಾಸಿಗಳು ನನಗೆ ಪರಿಚಿತರು. ಸುಮಾರು 50 ಅಗ್ನಿಶಾಮಕ ದಳದ ಸಿಬ್ಬಂದಿ ಮತ್ತು ಐದು ಅಗ್ನಿಶಾಮಕ ವಾಹನಗಳು ಸ್ಥಳಕ್ಕೆ ತಲುಪಿದವು. ಅವರು ಟೆರೇಸ್‌ನಲ್ಲಿ ಸಿಲುಕಿಕೊಂಡಿದ್ದ 18 ಜನರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಿದರು. ಅಗ್ನಿಶಾಮಕ ದಳದ ಸಿಬ್ಬಂದಿ ಶ್ಲಾಘನೀಯ ಕೆಲಸ ಮಾಡಿದರು” ಎಂದು ಸಾಂಘವಿ ಹೇಳಿದರು.
