ಇಡುಕ್ಕಿ : ಕೇರಳದಲ್ಲಿ ನಡೆಯುತ್ತಿರುವ ಪಂಚಾಯಿತಿ ಚುನಾವಣೆಯಲ್ಲಿ ಮತದಾರರ ಗಮನ ಸೆಳೆದಿರುವ ವಿಶಿಷ್ಟ ಅಂಶವೇ, ಇಡುಕ್ಕಿ ಜಿಲ್ಲೆಯ ಮುನ್ನಾರ್ ಪ್ರದೇಶದಲ್ಲಿ ‘ಸೋನಿಯಾ ಗಾಂಧಿ’ ಎಂಬ ಹೆಸರಿನ ಅಭ್ಯರ್ಥಿ ಬಿಜೆಪಿ ಪರವಾಗಿ ಕಣಕ್ಕಿಳಿದಿರುವುದು. ಹೆಸರಿನ ಕಾರಣದಿಂದಲೇ ಈ ವಾರ್ಡ್ ಇದೀಗ ರಾಜ್ಯದ ರಾಜಕೀಯ ಕಣಗಳನ್ನು ತನ್ನತ್ತ ಸೆಳೆದಿದೆ.
ಈ ಅಭ್ಯರ್ಥಿಯ ತಂದೆ ದುರೈ ರಾಜ್, ಕಾಂಗ್ರೆಸ್ ಪಕ್ಷದ ನಿಷ್ಠಾವಂತ ಕಾರ್ಯಕರ್ತರಾಗಿದ್ದು, ಪಕ್ಷದ ಮೆಚ್ಚುಗೆಗಾಗಿ ತಮ್ಮ ಮಗಳನ್ನು ಸೋನಿಯಾ ಗಾಂಧಿ ಎಂದು ಹೆಸರಿಸಿದ್ದರು. ಆದರೆ ಜೀವನದ ಕವಲುಗಳು ವಿಭಿನ್ನ ದಾರಿಯಲ್ಲಿ ಸಾಗಿದ್ದು, ಸೋನಿಯಾ ಗಾಂಧಿ ಅವರು ಬಳಿಕ ಮುನ್ನಾರ್ ಪಂಚಾಯಿತಿ ಪ್ರಧಾನ ಕಾರ್ಯದರ್ಶಿಯಾಗಿದ್ದ ಬಿಜೆಪಿಯ ಸುಭಾಷ್ ರನ್ನು ವಿವಾಹವಾದರು. ನಂತರ ತಾವೂ ಬಿಜೆಪಿ ಸೇರ್ಪಡೆಯಾಗಿ, ಈ ಬಾರಿ ಪಕ್ಷದಿಂದಲೇ ಮೊದಲ ಬಾರಿಗೆ ಚುನಾವಣಾ ರಣತಂತ್ರದಲ್ಲಿ ಭಾಗಿಯಾಗಿದ್ದಾರೆ.
ಸ್ಥಳೀಯ ರಾಜಕೀಯ ಗಣಿತಕ್ಕಿಂತಲೂ ಈ ಅಭ್ಯರ್ಥಿಯ ಹೆಸರೇ ಮತದಾರರಲ್ಲಿ ಹೆಚ್ಚಿನ ಚರ್ಚೆಗೆ ಕಾರಣವಾಗಿದೆ. ಬಿಜೆಪಿ ಅಭ್ಯರ್ಥಿ ಸೋನಿಯಾ ಗಾಂಧಿ ಅವರ ಎದುರು ಕಾಂಗ್ರೆಸ್ ಪರವಾಗಿ ಮಂಜುಳಾ ರಮೇಶ್ ಕಣಕ್ಕಿಳಿದಿದ್ದಾರೆ. ಮುಂದಿನ ದಿನಗಳಲ್ಲಿ ಈ ಹೆಸರಿನ ರಾಜಕೀಯ ರೀತಿಯ ಪರಿಣಾಮ ಹೇಗಿರುತ್ತದೆ ಎಂಬುದೇ ಈಗಾಗಲೇ ಕುತೂಹಲಕ್ಕೆ ಕಾರಣವಾಗಿದೆ.
