ನವದೆಹಲಿ : ಪ್ಯಾಂಥೆರಾ ಓಂಕಾ ಎನ್ನುವ ವೈಜ್ಞಾನಿಕ ಹೆಸರಿನ ಜಾಗ್ವಾರ್ ದೈತ್ಯ ಬೆಕ್ಕಿನ ಜಾತಿಗೆ ಸೇರಿದ ಶಕ್ತಿಶಾಲಿ ಕಾಡುಪ್ರಾಣಿ. ಹುಲಿ, ಸಿಂಹ, ಚಿರತೆಗಳಂತೆ ಇದು ಕೂಡ ಪ್ರಾಕೃತಿಕ ಆಹಾರ ಸರಪಳಿಯ ಉನ್ನತ ಸ್ಥಾನದ ಬೇಟೆಗಾರ. ಆದರೆ ಇಂದು ಜಾಗ್ವಾರ್‌ಗಳನ್ನು ಕಾಡಿನಲ್ಲಿ ಕಾಣುವುದು ಅಪರೂಪ. ಹವಾಮಾನ ಬದಲಾವಣೆ, ಕಾಡಿನ ನಾಶ, ಅನಧಿಕೃತ ಬೇಟೆಯಿಂದಾಗಿ ಇವುಗಳ ಸಂತತಿ ತೀವ್ರ ಅಪಾಯಕ್ಕೆ ಗುರಿಯಾಗಿದೆ. ಈ ಹಿನ್ನೆಲೆ ಜಾಗ್ವಾರ್ ಸಂರಕ್ಷಣೆಯ ಮಹತ್ವ ಅರಿವು ಮೂಡಿಸಲು ಪ್ರತಿ ವರ್ಷ ನವೆಂಬರ್ 29ರಂದು ‘ಅಂತರರಾಷ್ಟ್ರೀಯ ಜಾಗ್ವಾರ್ ದಿನ’ ಎಂದು ಆಚರಿಸಲಾಗುತ್ತದೆ.
ಅಂತರರಾಷ್ಟ್ರೀಯ ಜಾಗ್ವಾರ್ ದಿನದ ಇತಿಹಾಸ : ಅಂತರರಾಷ್ಟ್ರೀಯ ಜಾಗ್ವಾರ್ ದಿನವನ್ನು 2018ರಲ್ಲಿ ಸ್ಥಾಪಿಸಲಾಯಿತು. ಜಾಗ್ವಾರ್‌ಗಳ ಸಂರಕ್ಷಣೆಗೆ ಜಾಗತಿಕ ಮಟ್ಟದಲ್ಲಿ ನಡೆಯುತ್ತಿರುವ ಪ್ರಮುಖ ಅಭಿಯಾನದ ಭಾಗವಾಗಿ ಈ ದಿನವನ್ನು ಆಯ್ಕೆ ಮಾಡಲಾಯಿತು. ಬೆಕ್ಕಿನ ಜಾತಿಯ ಕಾಡುಪ್ರಾಣಿಗಳನ್ನು ರಕ್ಷಿಸಲು ಸಮರ್ಪಿತವಾಗಿರುವ ‘ಪ್ಯಾಂಥೆರಾ’ ಸಂಸ್ಥೆ, ಅನೇಕ ದೇಶಗಳ ಸರ್ಕಾರಗಳು ಮತ್ತು ಸಂರಕ್ಷಣಾ ಸಂಘಟನೆಗಳ ಸಹಯೋಗದಿಂದ ಈ ಉಪಕ್ರಮವನ್ನು ಆರಂಭಿಸಿತು.
ಮೆಕ್ಸಿಕೋದಿಂದ ಅರ್ಜೆಂಟೀನಾವರೆಗೆ ಇರುವ 18 ದೇಶಗಳಲ್ಲಿನ ಜಾಗ್ವಾರ್‌ಗಳ ನೈಸರ್ಗಿಕ ವಾಸಸ್ಥಾನಗಳನ್ನು ಕನೆಕ್ಟ್ ಮಾಡುವ ‘ಜಾಗ್ವಾರ್ ಕಾರಿಡಾರ್ ಇನಿಶಿಯೇಟಿವ್’ ಕಾರ್ಯಕ್ರಮ ಜಾರಿಗೆ ಬಂದ ದಿನದ ಗೌರವಾರ್ಥವಾಗಿ ನವೆಂಬರ್ 29ನ್ನು ಆಯ್ಕೆ ಮಾಡಲಾಗಿದೆ. ಈ ವಿಭಿನ್ನಕಾರ್ಯಕ್ರಮಗಳು ಜಾಗ್ವಾರ್‌ಗಳು ಮುಕ್ತವಾಗಿ ಸಂಚರಿಸಲು ಹಾಗೂ ತಮ್ಮ ಜನಸಂಖ್ಯೆಯನ್ನು ಕಾಪಾಡಿಕೊಳ್ಳಲು ಅರಿವು ಮೂಡಿಸುವ ಅತ್ಯಂತ ಪ್ರಮುಖ ಕಾರ್ಯವಾಗಿದೆ.
ಅಂತರರಾಷ್ಟ್ರೀಯ ಜಾಗ್ವಾರ್ ದಿನದ ಮಹತ್ವ :
-ಜಾಗ್ವಾರ್‌ಗಳ ಪರಿಸರ ಪ್ರಾಮುಖ್ಯತೆ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸುವುದು
-ಜಾಗ್ವಾರ್‌ಗಳು ಕಾಡಿನ ಪರಿಸರ ಸಮತೋಲನ ಕಾಪಾಡುವಲ್ಲಿ ಪ್ರಮುಖ ಪಾತ್ರವಹಿಸುತ್ತವೆ.
-ಬೇಡಿಕೆ–ಪೂರೈಕೆ, ಆವಾಸಸ್ಥಾನದ ನಾಶ ಮುಂತಾದ ಅಪಾಯಗಳಿಂದ ಜಾಗ್ವಾರ್‌ಗಳನ್ನು ರಕ್ಷಿಸಲು ಸಂರಕ್ಷಣಾ ಕಾರ್ಯಕ್ಕೆ ಉತ್ತೇಜನ.
-ವನ್ಯಜೀವಿ ಕಾರಿಡಾರ್‌ಗಳು, ಸಂರಕ್ಷಿತ ಮೀಸಲು ಪ್ರದೇಶಗಳ ನಿರ್ಮಾಣಕ್ಕೆ ಪ್ರೇರೇಪಣೆ.
-ಸರ್ಕಾರಗಳು ಮತ್ತು ಪರಿಸರ ಸಂಘಟನೆಗಳು ಸಂರಕ್ಷಣಾ ಯೋಜನೆಗಳಿಗೆ ಹಣಕಾಸು ಹಾಗೂ ತಾಂತ್ರಿಕ ಬೆಂಬಲ ನೀಡಲು ಪ್ರೋತ್ಸಾಹ.
ಪ್ರಕೃತಿ ಮಾನವನ ಸರ್ವತೋಮುಖ ಅಭಿವೃದ್ಧಿಗೆ ತನ್ನೆಲ್ಲಾ ಸಂಪತ್ತನ್ನು ಧಾರಾಳವಾಗಿ ಧಾರೆ ಎರೆದಿದೆ. ಆದರೆ ಮನುಷ್ಯ ಈ ಸಂಪದ್ಭರಿತ ಪರಿಸರವನ್ನು ತಮ್ಮ ಸ್ವಂತಕ್ಕಾಗಿ ಉಪಯೋಗಿಸುತ್ತಿದ್ದಾನೆ. ಮಾನವನಂತೆ ಉಳಿದೆಲ್ಲಾ ಜೀವಿಗಳಿಗೂ ಭೂಮಿಯಲ್ಲಿ ಜೀವಿಸೋ ಅಧಿಕಾರವಿದೆ. ಅದರಂತೆ ಪ್ರಕೃತಿ ಸಮತೋಲನ ಮತ್ತು ಕಾಡಿನ ಆರೋಗ್ಯಕ್ಕಾಗಿ ಜಾಗ್ವಾರ್‌ಗಳನ್ನು ಉಳಿಸಿಕೊಳ್ಳುವುದು ಅತ್ಯಂತ ಅವಶ್ಯಕ. ಜಾಗೃತಿಯಿಂದ ಸಂರಕ್ಷಣೆಯವರೆಗೆ ಈ ದಿನದ ಉದ್ದೇಶ ಜಾಗ್ವಾರ್‌ಗಳ ಭವಿಷ್ಯ ಸುರಕ್ಷಿತಗೊಳಿಸುವುದು
