ಗಾಂಧಿನಗರ:ಪ್ರಧಾನಿ ನರೇಂದ್ರ ಮೋದಿ ಹೆಸರಿನಲ್ಲಿ ಮೂರು ಯೋಜನೆಯನ್ನು ಜಾರಿಗೊಳಿಸಲು ಗುಜರಾತ್ ಸರ್ಕಾರವು ಮುಂದಾಗಿದೆ.
2024-25 ಹಣಕಾಸು ವರ್ಷದ ರಾಜ್ಯ ಬಜೆಟ್‌ ಅನ್ನು ಫೆ. 2 ರಂದು ಹಣಕಾಸು ಸಚಿವ ಕನುಭಾಯಿ ದೇಸಾಯಿ ಅವರು ಮಂಡಿಸಿದ್ದು. ಇದೇ ಸಮಯದಲ್ಲ್ಲಿ ನಮೋ ಲಕ್ಷ್ಮಿ, ನಮೋ ಸರಸ್ವತಿ, ನಮೋ ಶ್ರೀ ಹೆಸರಿನ ಮೂರು ಯೋಜನೆಗಳನ್ನು ಘೋಷಣೆ ಮಾಡಿದರು.
ನಮೋ ಲಕ್ಷ್ಮಿ : ಈ ಯೋಜನೆಯು ಬಾಲಕಿಯರ ವಿದ್ಯಾಭ್ಯಾಸಕ್ಕೆ ಉತ್ತೇಜನ ನೀಡಲು ಆರಂಭಿಸಲಾಗಿದ್ದು ಈ ಯೋಜನೆಯ ಅಡಿ 9 ಮತ್ತು 10 ತರಗತಿಯಲ್ಲಿ ವರ್ಷಕ್ಕೆ 10 ಸಾವಿರ ರೂ. ನೀಡಿದರೆ 11 ಮತ್ತು 12ನೇ ತರಗತಿಯಲ್ಲಿ 15 ಸಾವಿರ ರೂ. ನೀಡಲಾಗುತ್ತದೆ. 12ನೇ ತರಗತಿ ಮುಗಿಯುವ ವೇಳೆ ಬಾಲಕಿಯೊಬ್ಬಳಿಗೆ ಒಟ್ಟು 50 ಸಾವಿರ ರೂ. ಸಿಗಲಿದೆ. 2024-25ರಲ್ಲಿ ಈ ಯೋಜನೆ ಜಾರಿಗೆ ಒಟ್ಟು 1,250 ಕೋಟಿ ರೂ. ಹಣವನ್ನು ಮೀಸಲಿಡಲಾಗಿದೆ.
ನಮೋ ಸರಸ್ವತಿ: ಕಡಿಮೆ ಮತ್ತು ಮಧ್ಯಮ ಆದಾಯದ ಕುಟುಂಬಗಳಿಂದ ವಿಜ್ಞಾನ ವಿಭಾಗಕ್ಕೆ ಸೇರುವ ವಿದ್ಯಾರ್ಥಿಗಳಿಗೆ 11ನೇ ತರಗತಿಯಲ್ಲಿ ಓದುವಾಗ ವಾರ್ಷಿಕ 10,000 ಮತ್ತು 12 ನೇ ತರಗತಿಯಲ್ಲಿ ಓದುವಾಗ 15,000 ರೂ. ಸಹಾಯಧನ ನೀಡಲಾಗುತ್ತದೆ.
ನಮೋ ಶ್ರೀ : ಈ ಯೋಜನೆಯಡಿ, SC, ST, NFSA ಮತ್ತು PM-JAY ಫಲಾನುಭವಿಗಳು ಸೇರಿದಂತೆ 11 ವರ್ಗಗಳಿಗೆ ಸೇರಿದ ಗರ್ಭಿಣಿಯರಿಗೆ 12,000 ರೂ. ಸಹಾಯವನ್ನು ನೀಡಲಾಗುತ್ತದೆ.
