ದೆಹಲಿ: ಪರೀಕ್ಷಾ ಅಕ್ರಮಗಳ ವಿರುದ್ಧ ಹಾಗೂ ದೇಶದ ವಿದ್ಯಾರ್ಥಿಗಳ ಭವಿಷ್ಯಕ್ಕಾಗಿ ದೆಹಲಿಯ ಜಂತರ್ ಮಂತರ್ನಲ್ಲಿ ನಡೆಯುತ್ತಿರುವ ಶಿಕ್ಷಣ ಸುಧಾರಣಾವಾದಿ ಹಾಗೂ ಸಾಮಾಜಿಕ ಹೋರಾಟಗಾರ ಸೋನಮ್ ವಾಂಗ್ಚುಕ್ ಅವರ ಆಮರಣಾಂತ ಉಪವಾಸ ಸತ್ಯಾಗ್ರಹವು 17ನೇ ದಿನಕ್ಕೆ ಕಾಲಿಟ್ಟಿದೆ.
ನಿರಂತರ ಉಪವಾಸದಿಂದಾಗಿ 59 ವರ್ಷದ ವಾಂಗ್ಚುಕ್ ಅವರ ಆರೋಗ್ಯ ಪರಿಸ್ಥಿತಿ ತೀವ್ರವಾಗಿ ಹದಗೆಟ್ಟಿದ್ದು, ಈವರೆಗೆ ಬರೋಬ್ಬರಿ 8.25 ಕೆಜಿ ತೂಕ ಕಳೆದುಕೊಂಡಿದ್ದಾರೆ ಎಂದು ಕಾಕ್ರಾಚ್ ಜನತಾ ಪಾರ್ಟಿ (CJP) ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಹೇಳಿದ್ದಾರೆ.
ವಾಂಗ್ಚುಕ್ ಅವರ ರಕ್ತದ ಸಕ್ಕರೆ ಮಟ್ಟವು (Blood Sugar) ಸತತವಾಗಿ 70 ಮಿಗ್ರಾಂ/ಡಿಎಲ್ಗಿಂತ ಕೆಳಕ್ಕೆ ಕುಸಿದಿದ್ದು, ತೀವ್ರ ತಲೆಸುತ್ತು, ಮಾಂಸಖಂಡಗಳ ಸವೆತ ಹಾಗೂ ವಿಪರೀತ ದೈಹಿಕ ದೌರ್ಬಲ್ಯದಿಂದ ಬಳಲುತ್ತಿದ್ದಾರೆ. ಅವರ ಪಕ್ಕೆಲುಬುಗಳು ಈಗ ಸ್ಪಷ್ಟವಾಗಿ ಕಾಣಿಸುತ್ತಿದ್ದರೂ ಹೋರಾಟದಿಂದ ಹಿಂದೆ ಸರಿಯುತ್ತಿಲ್ಲ ಎಂದು ದೀಪ್ಕೆ ತಿಳಿಸಿದ್ದಾರೆ.
ಯಾರು ಈ ಸೋನಮ್ ವಾಂಗ್ಚುಕ್ …!
ಸೋನಮ್ ವಾಂಗ್ಚುಕ್ ಅವರು ಭಾರತದ ಪ್ರಸಿದ್ಧ ಇಂಜಿನಿಯರ್, ನಾವೀನ್ಯಕಾರ (Innovator), ಶಿಕ್ಷಣ ಸುಧಾರಕ ಮತ್ತು ಪರಿಸರ ಕಾರ್ಯಕರ್ತರಾಗಿದ್ದಾರೆ. ಇವರು ಲಡಾಖ್ನ ವಿದ್ಯಾರ್ಥಿಗಳ ಶೈಕ್ಷಣಿಕ ಮತ್ತು ಸಾಂಸ್ಕೃತಿಕ ಚಳುವಳಿಯ (SECMOL) ಸಂಸ್ಥಾಪಕ-ನಿರ್ದೇಶಕರಾಗಿದ್ದಾರೆ.
ಪ್ರಮುಖ ಸಾಧನೆಗಳು ಮತ್ತು ಕೊಡುಗೆಗಳು:
ಐಸ್ ಸ್ತೂಪ (Ice Stupa): ಲಡಾಖ್ನಂತಹ ಪರ್ವತ ಪ್ರದೇಶಗಳಲ್ಲಿ ಬೇಸಿಗೆಯಲ್ಲಿ ಎದುರಾಗುವ ನೀರಿನ ಕೊರತೆಯನ್ನು ನೀಗಿಸಲು ಚಳಿಗಾಲದ ನೀರನ್ನು ಬೃಹತ್ ಮಂಜುಗಡ್ಡೆಯ ಸ್ತೂಪಗಳ ರೂಪದಲ್ಲಿ ಶೇಖರಿಸಿಟ್ಟು, ವಸಂತಕಾಲದಲ್ಲಿ ಕೃಷಿಗೆ ಬಳಸುವ ಕೃತಕ ಹಿಮನದಿ ತಂತ್ರಜ್ಞಾನವನ್ನು ಇವರು ಸಂಶೋಧಿಸಿದ್ದಾರೆ.
ಶೈಕ್ಷಣಿಕ ಸುಧಾರಣೆ: ಲಡಾಖ್ನ ಸರ್ಕಾರಿ ಶಾಲಾ ವ್ಯವಸ್ಥೆಯಲ್ಲಿ ಸುಧಾರಣೆ ತರಲು ‘ಆಪರೇಷನ್ ನ್ಯೂ ಹೋಪ್’ ಆರಂಭಿಸಿದರು. ಪರೀಕ್ಷೆಗಳಲ್ಲಿ ಅನುತ್ತೀರ್ಣರಾದ ವಿದ್ಯಾರ್ಥಿಗಳಲ್ಲಿ ಅಡಗಿರುವ ನೈಜ ಪ್ರತಿಭೆಯನ್ನು ಹೊರತರಲು ಪ್ರಾಯೋಗಿಕ ಕಲಿಕೆಗೆ ಒತ್ತು ನೀಡುವ ಪರ್ಯಾಯ ಶಾಲಾ ಕ್ಯಾಂಪಸ್ ಅನ್ನು ಇವರು ಮುನ್ನಡೆಸುತ್ತಿದ್ದಾರೆ.
ಪರಿಸರಸ್ನೇಹಿ ಕಟ್ಟಡಗಳು: ಲಡಾಖ್ನ ತೀವ್ರ ಚಳಿಗಾಲದಲ್ಲೂ (ಮೈನಸ್ ತಾಪಮಾನದಲ್ಲಿ) ಯಾವುದೇ ಬಾಹ್ಯ ಇಂಧನ ಅಥವಾ ಹೀಟರ್ ಬಳಸದೆ ಕೇವಲ ಸೌರಶಕ್ತಿಯಿಂದ ಒಳಗಡೆ ಬೆಚ್ಚಗಿರುವ ಮಣ್ಣಿನ ಕಟ್ಟಡಗಳನ್ನು ಇವರು ವಿನ್ಯಾಸಗೊಳಿಸಿದ್ದಾರೆ.
ಪ್ರಶಸ್ತಿಗಳು: ಇವರ ನಾವೀನ್ಯತೆ ಮತ್ತು ಸಾಮಾಜಿಕ ಕೊಡುಗೆಗಳಿಗಾಗಿ ಜಾಗತಿಕ ಮಟ್ಟದ ಪ್ರತಿಷ್ಠಿತ ರೇಮನ್ ಮ್ಯಾಗ್ಸೇಸೆ ಪ್ರಶಸ್ತಿ (Ramon Magsaysay Award) ಮತ್ತು ರೋಲೆಕ್ಸ್ ಪ್ರಶಸ್ತಿ ಸೇರಿದಂತೆ ಹಲವು ಗೌರವಗಳು ಸಂದಿವೆ.
ಗಮನಾರ್ಹ ಸಂಗತಿ: ಬಾಲಿವುಡ್ನ ಪ್ರಸಿದ್ಧ ಚಲನಚಿತ್ರ ‘3 Idiots’ ನ ‘ಫುನ್ಸುಖ್ ವಾಂಗ್ಡು’ (ಆಮೀರ್ ಖಾನ್ ಅಭಿನಯದ) ಪಾತ್ರಕ್ಕೆ ಸೋನಮ್ ವಾಂಗ್ಚುಕ್ ಅವರ ಜೀವನ ಮತ್ತು ಸಾಧನೆಗಳೇ ಮುಖ್ಯ ಪ್ರೇರಣೆಯಾಗಿದೆ.
